यंदा २५, २६ व २७ मे रोजी होणार `पेरा सीईटी-२०२३`

२० मे रोजी अर्ज भरण्याचा शेवटचा दिवस, २ जूनला लागणार निकाल

पुणे : प्रीमिनेंट एजुकेशन अॅण्ड रिसर्च असोसिएशन (PERA) अर्थात `पेरा` या खासगी विद्यापीठांच्या संघटनेच्या वतीने यंदा दि. २५, २६ व २७ मे २०२३ रोजी `सीईटी` परीक्षा घेण्यात येत आहे. या परीक्षेसाठी अर्ज करण्याचा शेवटचा दिवस २० मे असून, परीक्षेचा निकाल २ जून रोजी घोषित करण्यात येणार आहे, अशी माहिती `पेरा`चे    सदस्य विद्यापीठ श्री बालाजी विद्यापीठाचे कुलगुरू डॉ. जी. के. शिरुडे यांनी दिली.

या परीक्षेसंदर्भात माहिती देण्यासाठी नवी पेठेतील श्रमिक पत्रकार भवनाच्या सभागृहात आयोजित करण्यात आलेल्या पत्रकार परिषदेत डॉ. शिरुडे बोलत होते. या पत्रकार परिषदेला `पेरा`चे सीईओ हणमंत पवार, स्ट्रॅटेजिक अॅडव्हायजर प्रा. डाॅ. सुराज भोयर यांच्यासह एमआयटी-वर्ल्ड पीस युनिव्हर्सिटीचे कुलगुरूडॉ. रवीकुमार चिटणीस,  डीवाय पाटील विद्यापीठ अंबीच्या कुलगुरू डॉ. सायली गणकर आणि पी  ए इनामदार विद्यापीठाचे कुलगुरू डॉ लॉरेंस आदि उपस्थित होते.

डॉ शिरुडे पुढे म्हणाले की, राज्यात स्थापित असलेल्या २० नामांकित खासगी विद्यापीठांमध्ये पदवी आणि पदव्युत्तर अभ्यासक्रम, जसे की इंजीनियरिंग, बायोइंजीनियरिंग, फुड टेक्नोलाॅजी, मरीन इंजीनियरिंग, अॅग्री इंजीनियरिंग, फार्मसी, फाईन आर्ट्स, डिझाईन, मॅनेजमेंट, विधी (लाॅ) आणि आर्किटेक्चर या विषयांसाठी प्रवेश घ्यायचा असेल तर ही परीक्षा देणे अनिवार्य आहे.

या परीक्षेच्या आधारावर विद्यार्थ्यांना खासगी विद्यापीठांमध्ये प्रवेश प्राप्त होणार आहे. मागील वर्षीप्रमाणे या वर्षीदेखील `पेरा-सीईटी` आॅनलाईन प्राॅक्टर्डद्वारे घेण्यात येणार आहे. या परीक्षेसाठी विद्यार्थ्यांनी दि. २० मे पर्यंत आॅनलाईन नावनोंदणी करावी. विद्यार्थ्यांनी अधिक माहितीसाठी www.peraindia.in या संकेतस्थळाला भेट द्यावी.

 गेल्या पाच वर्षांपासून पेराच्या वतीने अशाप्रकारची परीक्षा यशस्वीपणे घेण्यात येत आहे. या माध्यमातून आतापर्यंत राज्यात साडेतीन लाख विद्यार्थ्यांना विविध विद्यापीठांमध्ये उच्च शिक्षण प्राप्त करून त्यांचे व्यावसायिक करियर पूर्ण करण्याची संधी मिळाली. या वर्षी देखील हजारो विद्यार्थ्यांना राज्यात या माध्यमातून उच्च शिक्षण प्राप्त करून एक उज्ज्वल प्रोफेशनल करियर प्राप्त करण्याची संधी मिळणार आहे.

`पेरा` अंतर्गत असलेली विद्यापीठे याप्रमाणे :

एमआयटी-एडीटी, एमआयटी-डब्ल्यूपीयू, संजय घोडावत युनिव्हर्सिटी, संदीप युनिव्हर्सिटी, स्पायसर, डी. वाय. पाटील युनिव्हर्सिटी, डी. वाय. पाटील इंटरनॅशनल युनिव्हर्सिटी,  अजिंक्य डी. वाय. पाटील युनिव्हर्सिटी, एमजीएम युनिव्हर्सिटी, सिंबायोसिस स्किल्स अॅण्ड प्रोफेशनल युनिव्हर्सिटी, संदीप युनिव्हर्सिटी, सोमैय्या विद्याविहार युनिव्हर्सिटी, विजयभूमी युनिव्हर्सिटी, विश्वकर्मा युनिव्हर्सिटी, डी. वाय. पाटील अॅग्रीकल्चर अॅण्ड टेक्निकल युनिव्हर्सिटी, श्री बालाजी युनिव्हर्सिटी, फ्लेम युनिव्हर्सिटी, डाॅ. पी. ए. ईनामदार युनिव्हर्सिटी, जेएसपीएम युनिव्हर्सिटी, एनआयसीएमएआर युनिव्हर्सिटी, पिंपरी-चिंचवड युनिव्हर्सिटी.

इयत्ता 12वीची विद्यार्थिनी कृती सूद म्हणाली की, महाराष्ट्र सीईटी परीक्षा आणि जेईई 2023 सोबत, ही खाजगी विद्यापीठाची सीईटी परीक्षा आमच्यासाठी तितकीच महत्त्वाची आहे. मला एआय आणि एमएलमध्ये स्पेशलायझेशनसह बीटेकसाठी प्रवेश घ्यायचा आहे, आणि काही सर्वोत्तम खाजगी विद्यापीठे आहेत जी जागतिक प्रदर्शनासह दर्जेदार शिक्षण देतात.

- `पेरा` च्या स्थापनेमागील उद्देश्य

`पेरा` या संघटनेची स्थापना ही खासगी विद्यापीठांच्या माध्यमातून शैक्षणिक क्षेत्राला एका उंचीवर नेण्यासाठी आणि उच्च शिक्षणात नवनवीन प्रवाह, आधुनिक तंत्रज्ञान, पाठ्यक्रमांमध्ये नावीन्य आणि लवचिकता आणण्यासाठी झाली आहे. या संघटनेची तशी अनेक प्रकारची उद्दिष्टे आहेत. ती उद्दिष्टे प्रामुख्याने खालीलप्रमाणे आहेत. उच्च शिक्षण, संशोधन आणि इतर अभ्यासक्रमेतर आणि सह-अभ्यासक्रम क्रियाकलापांना प्रोत्साहन देणे, उच्च शिक्षणाच्या सर्वांगीण अनुकूल उन्नतीसाठी आणि प्रगतीसाठी मदत करणे, ज्ञानाच्या प्रगतीमध्ये मदत करणे.